 |
  |
Üdgündə doğuldum …
Üdgündə doğuldum …
Zəngilan obasında
arıçı Həsənxanın qosqoca odasında
ağlayıb kirimişəm kallayı otaqda
bir yaşımda ölürmüşəm –
çöpümü çıxarıb Qibləli kişi
Allah kərimdi –deyib
Ölüm yoxdu ta mənə.
Atalı-analı böyüsün oğlum
yanında böyüdüm nənələrimin-
yanında böyüdüm Lala arvadın
yanında böyüdüm Qarabirçəyin.
Sonra yavaş-yavaş getdi kürlüyüm
sonra gələ-gələ qafam boyüdü
sonra gələ-gələ ğözüm böyüdü-
təbaşir əlimdə sevdim qızları.
Sonra oxudum
Şərabçı oldum
Sonra vuruldum bir türk qızına
evlilik həyatı qatdı başımı.
bir ev qaraladım çıxdı əlimdən
savaşda uduzdum ermənilərə
…Tanrı dərğahına qovuşdu oğlum
elə bir yaşında
Qibləli kişi yoxuydu onda
boğazın bassın
Allaha qurban olum
indi iki oğlum — əskər yaşında.
Cavidin, Cavadın yoluna çıxdım
üzümə qoydular dostu-tanışı
üzümə vurdular hər addımbaşı
haram elədilər ilk kitabımı.
Sonra qəzalar 40 yaşdan bəri
bir ömrü verdim yelə.
atam öldü 98-də
sonra ürəyim
sonra da belə…
***
Məni sevənlərim dünyada yoxdu,
Hələ doğulmayıb məni sevənlər.
Yüz il də, min il də dayanım, durum,
Məni sevə bilməzsən, yavrum.
Əllərim yaraşmır ağ əllərinə,
Saçımın bəyazı rəngimə düşmür.
Ömrümə, günümə yüz sığal vurum,
Məni sevə bilməzsən, yavrum.
Gözümün içinə bir qadın ağlar,
Axşamım oxşamır axşamlarına,
Səhərim ümidsiz,
Allahım yorğun,
Məni sevə bilməzsən, yavrum.
***
Bu son bahar …
Bu son bahar …
Sən bir süslü çiçək,
Bir azdan yarpaqlar düşəcək .
Başımızın üstündə bu qara sevda
Yenə gözlərini yumub tökəcək.
Yenə aramızda bir qara çətir,
Bir qara eynək,
Taleyin araya atdığı əlcək…
Sənə ğöz yaşıntək yaxınam demək.
Qəhvəyi gözlərin dumduru bulaq,
Çiçək yanağında ilıq qar izi.
…bu axşam əllərin öpülməyəcək,
Səni göz yaşımtək sevirəm demək
***
...
Allahdan aşağı sevgilər yetim
Sevdalı ömürlər kəpənək kimi
Allahdan aşağı…
Sevgili ölümlər hər gün təzədi.
Allahdan aşağı Günün altında
Ümidlə boylanır sabaha sarı
Adamın özünə qanı qaynamır
Adamın özünə gücü çatmayır.
Əlləri uzanır Günəş uzaqdı
Gözünü göy çəkir Allah görünməz.
Bayatı gülləsi – qəfil təsəlli
Yaralı adamlar saç yolur hələ
Yerinə yurduna yağışlar yağır
Yağır kipriklərin kölgəsinə də
Allahdan aşağı hamı yaşayır
Allahdan aşağı … hamı öləcək.
Ölümün çarəsi yoxdu, allahım
hamının üstündə torpaq bitəcək.
Allahdan aşağı sevgilər yetim
Sevdalı ömürlər kəpənək kimi
Allahdan aşağı …
Sevgili ölümlər təzədi hər gün .
***
( rekviyem)
Nə yağış yağacaq, nə gün çıxacaq,
Nə də küləklər əsəcək səmtinə,
Nə də ki, havanın bozbulanıqlığı
heç vaxt düşməyəcək mənim rəngimə.
Nə səni görəcəm, nə də oğlumu,
Nə də ki, itik gördüyüm yuxumu.
O gün dəfn edəcəm öz yoxluğumu,
başa qaxınc olan yoxsulluğumu.
O gün dəfn edəcəm dərdi, sərimi,
Kölgəsi gözümün altına düşən
şer dəftərimi.
Zəhmindən düşəcək qara buludlar
Tanrıdan alacam icazəmi də.
Heç kimə yavıncı olmayacağam –
Özüm aparacam cənazəmi də.