Sentyabrın 25-də Mədəniyyət və Turizm Nazirliyinin "2010-2014-cü illər üçün Xalq Yaradıcılığı Paytaxtları" proqramına əsasən bu ilin "Folklor paytaxtı" elan olunmuş Balakəndə folklor və turizm festivalı başlandı, həmçinin poeziya görüşü keçirildi.

Mədəniyyət və Turizm Nazirliyinin və Balakən Rayon İcra Hakimiyyətinin birgə təşkilatçılığı ilə keçirilən festivalda Rusiya Federasiyası Dağıstan Respublikasının, Gürcüstanın, həmçinin Ağdam, İsmayıllı, Masallı, Şəki, Qax, Zaqatala və Balakən rayonlarının folklor kollektivləri iştirak edirlər.
Festival şəhərdəki Heydər Əliyev prospektində, Mədəniyyət mərkəzinin qarşısındakı meydanda kollektivlərin təqdimatı ilə başlandı. Gürcüstanın və Dağıstanın folklor və rəqs kollektivləri, Şəki rayonu Şorsu kənd mədəniyyət evinin "Abay" rəqs kollektivi, Ağdam rayonunun "Şur" ansamblı, Masallının "Halay" rəqs qrupu, Qax rayonunun "Peşvebi", İsmayıllı rayonunun "İvanovka", Zaqatala rayonunun "Qızılgül" folklor kollektivləri qısa proqramla çıxış etdilər.
Həmin gün rayon Mədəniyyət mərkəzində Bakıdan gəlmiş şairlərin rayon ictimaiyyətinin nümayəndələri, ədəbiyyat həvəskarları ilə görüşü keçirildi. Əməkdar incəsənət xadimi, şair Çingiz Əlioğlu, şair-tərcüməçi Ənvər Əhməd, şair Sərvaz Hüseynoğlu, Azərbaycan Yazıçılar Birliyinin mətbuat katibi, şair Xəyal Rza və şair Fərid Hüseyn qədim Azərbaycan torpağı olan Balakənin zəngin adət-ənənəyə, folklora sahib olduğunu bildirdilər, şeirlərindən nümunələr oxudular. Səmimi əhval-ruhiyyədə keçən poeziya gecəsi rayon sakinlərinə xoş anlar yaşatdı.
Günün ikinci yarısında Heydər Əliyev parkında festivalın rəsmi açılış mərasimi keçirildi. Tanınmış elm və incəsənət adamlarının, şəhər sakinlərinin iştirak etdiyi mərasimdə rayon İcra Hakimiyyətinin başçısı İslam Rzayev və Mədəniyyət və Turizm Nazirliyi Mədəniyyət siyasəti şöbəsinin müdiri Fikrət Babayev çıxış edərək çoxmillətli Balakən rayonunun, eyni zamanda, zəngin folklor ənənələrinə malik olduğunu bildirdilər. Vurğulandı ki, "Xalq Yaradıcılığı Paytaxtları" proqramı çərçivəsində həyata keçirilən festival xalqımıza xas olan mədəni irsi qoruyub saxlamaq və təbliğ etmək baxımından mühüm əhəmiyyət daşıyır.
Mərasimdə folklor və rəqs kollektivləri geniş konsert proqramı ilə çıxış etdilər. Şux rəqslər, milli folklor nümunələri tamaşaçılar tərəfindən alqışlarla qarşılandı. Parkda Balakən mətbəxi və dekorativ tətbiqi sənət nümunələrindən ibarət sərgilər təşkil edilmişdi.

Fotolar Ramazanındır

AYB Mətbuat Xidməti