 |
  |
Bədii Tərcümə Mərkəzinin hazırladığı antologiya işıq üzü gördü Bu yaxınlarda Mədəniyyət və Turizm Nazirliyinin dəstəyi ilə Azərbaycan və ingilis dillərində. ““Sarı gəlin” - XX Azərbaycan ədəbiyyatından seçmələr- Musiqili hekayətlər” adlı unikal bir antologiya işıq üzü görüb. Bu haqda məlumatı antologiyanın ideya müəllifi və tərtibçi redaktoru, Bədii Tərcümə və Ədəbi Əlaqələr Mərkəzinin sədri Səlim Babullaoğlu məlumat verib. O deyib ki, Azərbaycan və ingilis dillərində təqdim olunan antologiyaya Cəlil Məmmdəquluzadənin “Kamança” faciəsi, Əbdürrəhim bəy Haqverdiyevin “Qoca tarzən” hekayəsi, Xalq yazıçıları İsa Muğannanın “Saz” povesti və Elçinin “Sarı gəlin” hekayəsi, Əjdər Olun “ Usta Yusifin kamançası”, Məqsəd Nurun “ Ud”, Kərim Kərimli və Qismətin “Dvorjakın melodiyası” hekayələri daxil edilib. Eyni zamanda antologiyaya milli musiqi alətlərimiz olan tar, kamança, saz, balaban, ud və tütək haqqında sənətşünaslıq doktoru, əməkdar incəsənət xadimi Ziyadxan Əliyevin müfəssəl məqalələri daxil edilib. Bədii mətnlərin tərcüməçisi Azərbaycan Dövlət Mədəniyyət və İncəsənət Universitetinin Ədəbiyyat və Dillər kafedrasının baş müəllimi Səadət İbrahimova, bədii mətnlərin ingilis versiyasının redaaktoru “Visions of Azerbaijan” jurnalının redaktoru
İan Piertdir. Musiqi alətləri haqqında məqalələrin tərcüməçisi Sevil Gültən, redaktoru isə professor Cavanşir Yusiflidi, dizayneri Emil Camalov və Cavid Kişiyevdir. Tərcümələrin Bədii Tərcümə və Ədəbi Əlaqələr Mərkəzində hazırlandığını qeyd edən Səlim Babullaoğlu eksklüziv açıqlamasında müxbirimizə belə deyib: “ Əvvəla mən Mədəniyyət və Turizm nazirimiz Əbülfəs Qarayevə dərin təşəkkür edirəm. Hələ bir neçə il əvvəl mən öz ideyamı onunla bölüşəndə o məni dəstəklədi və sonradan antologiyanın tərcüməsinə start verdik. Qaldı ideyaya, Mədəniyyət və Turizm Nazirliyinin dəstəyi ilə “Şərq-Qərb” Nəşriyyat Evində nəfis şəkildə işıq üzü görən “Sarı gəlin” antologiyasının konsepsiyası çox sadədir. Musiqi alətlərinin adı ilə bağlı olan bədii əsərləri və adıkeçən milli musiqi alətlərimizlə bağlı məqalələri bir yerdə nəşr etmək. Özü də iki dildə, Azərbaycan və ingilis dillərində. Son illər Azərbaycanda çoxlu beynəlxalq musiqi festivalları keçirilir, ölkəmizə, musiqi ilə, incəsənətə bağlı çoxlu sayda əcnəbi qonaqlar gəlir. Bu cür kitab eyni zamanda həm musiqi mədəniyyətimizi, həm də ədəbiyyatımızı tanıtmaq üçün ən yaxşı vasitədir. Mən “giriş yazısı”nda bu haqda yazmışam. Kitabın adının da “Sarı gəlin” olması əlbəttə təsadüfi deyil. Əvvəla adın belə seçilməsini şərtləndirən birinci amil Xalq yazıçısı Elçinin “Sarı gəlin” hekayəsinin bədii məziyyətləri ilə bağlıdır. Sonra isə, bilirsiz ki, “Sarı gəlin” beynəlxalq arenada dartışılan və bədnam qonşularımızın sahiblənmək istədiyi bir musiqi əsərimizdir deyə, bu adın üzərində dayandıq. Bədii mətnlərin istedadlı tərcüməçisi Səadət İbrahimova və redaktoru İan Piert tandemi bu kitaba qədər də bir çox uğurlu layihələrə imza atıblar, yüksək peşəkardırlar və bu işi də uğurla icra ediblər. İstedadlı tərcüməçimiz Sevil Gültənin və redakto kimi professor Cavanşir Yusiflinin işi də dəyərlidir, odur ki, antologiyanın ölkəmizə gələn ingilisdilli insanlar üçün yetərincə maraq doğuran bir nəşr olacağına və eyni zamanda mədəniyyətimizin təbliğinə az da olsa bir töhfə verəcəyinə inanıram...”
AYB.az