“Qobustan” sənət toplusunun növbəti 2-ci  sayı dərc olunub.   Sənət toplusu bu dəfə də bir-birindən maraqlı və  rəngarəng  yazılarla  görüşünüzə gəlib.

“Qobustan”nın  bu sayı ilk səhifələrində   dramaturqların və sənətşünasların iştirakı ilə “Qobustan”jurnalının redaksiyasında  keçirilmiş  “Yeni dram niyə gecikir...” adlı dəyirmi masanın müzakirəsini sizlərə təqdim edir,  rejissor, aktyor  Ağalar İdrisoğlunun yaradıcılığına Hacı Tofiq Seyidzadənin tutduğu işıqla  nəzər salır, oxucuları  şair Yusif  Nəğməkarla  Firudin Qurbansoyun arasındakı  maraqlı dialoq-müsahibəyə dəvət edir. 

“Yurd yeri” bölməsində  jurnal hər kəsi  qədim  Dərbəndə səyahətə səsləyir.  Bu bölmədə  səyahətçiləri A. Bestujev Marlinskinin “Dərbənd civarından məktub...” adlı Qafqaz qeydləri, Dərbənd  Azərbaycan teatrı ilə tanışlıq, Dərbənd aşıq mühitinə qısa səyahət, unudulmaz bəstəkar  Hacı Xanməmmədova həsr olunmuş  “Tara vurğun dərbəndli” adlı yazı, habelə orta çağ  Dərbənd şairlərinin şeirləri gözləyir. 

Sənətşünaslıq doktoru, professor Zemfira Səfərovanın “Muğamşünaslığımız. Risalələrin tədqiqi və bir para qeyri  problemlər barədə...” yazısı, Vaqif Yusiflinin xanəndə Elnarə Abdullayevaya həsr olunmuş “Bir səsin sehri” essesi, Gülşən Kəngərlinin rəssam Bəhruz Kəngərli fırçasının sehrindən söz açdığı  “Səcərənin rəssam oğlu” məqaləsi çox maraqlıdır.

Fizzə Quliyeva isə “Bəhruzun davamşıları”  adlı yazısında teatr rəssamı Məmməd Qasımov sənətinə güzgü tutur.  Bu nömrədə sənətşünas Ziyadxan Əliyev sizləri  6 -cı sinif şagirdi Elnurun  sənət inciləri ilə tanış edəcək.    

Topluda El-Obamızın  qiymətli saxlanclarından olan  qədim “Xanxan “oyunları,  “Cirid- Qəpək” oyunları təqdim edilir, Almaz Yurdsevərin  qeydləri ilə “Borçalı xalçaları” nın ilmələri çözələnir.

Bilal Alarlı yenə folklora üz tutur, qədim “Kürdülər və Qıynalar” la oxucuları  tanış edir.

”Qobustan” öz oxucularını “Gəncə karvansarayı” na aparmağı da yaddan çıxartmır.  

Esmira Nəzərlinin “O birincilərdən idi...” yüziley  yazısısı  isə  görkəmli opera müğənnisi Ağababa Bünyadzadəyə həsr olunub.

 “Qobustan”  toplusunun  bu sayda  ədəbiyyatsevərlər üçün də    layiqli  töhvəsi var. Topluda  Mübariz Cəfərlinin “Axar su” pritçası və Nobel mükafatçısı olan Çin yazarı Mo Yan ın “Çaxırıstan” romanından bir parçanı təqdim olunur.

 “Qobustan” sənət  toplusunu  AYB – nin yaxınlığında yerləşən “Bayatı” kitab mağazasından və şəhərin başqa kitab mağazalarından əldə edə bilərsiniz.

Narıngül
AYB.az