 |
  |
Ötən gün Yazıçılar Birliyində şair Dayandur Sevginin 55 illiyinə həsr olunmuş tədbir və «Xoş gəldin 55 yaşım» kitabının imza günü keçirilib. Tədbiri açan xalq şairi Fikrət Qoca 55 yaşın cavanlıq yaşı olmasa da, hələ qocalıq dövrü olmadığını vurğulayıb. D.Sevginin şeirlərini bəyəndiyini deyən xalq şairi ona qarşıdakı illərdə də sevilən şeirlər yazmağı arzu edib. Tədbirin moderatoru, tənqidçi Əsəd Cahangir çıxışında bildirib ki, sözün yaxşı mənasında tərifdə qənaətcil olan Fikrət Qoca kimi xalq şairinin təqdirini qazanmaq uğurdur: «Fikrət müəllim hər şairin şeirini bəyənmir. Dayandurun şeirləri haqqında fikir bildirməsi yəqin ki, yubilyarı da sevindirir. Dayandur Sevginin şeirlərində taledən, zəmanədən şikayət motivləri güclüdür. Düşünürəm ki, bəzən konservativliyi qoruyub saxlamaq sənətkarın mənəvi gücünün rəmzidir. Dayandur Sevginin «Xoş gəldin 55 yaşım» kitabı Nizami ənənəsiylə yazılıb. Dayandurun şeirlərinin bir cəhəti xoşuma gəlir: O faktları mənalandırmağı bacarır. «Sıfır» şeirini bu baxımdan xüsusi qeyd edərdim». Ə. Cahangir D. Sevginin poeziyasını bir neçə il öncə onun 49 yaşı münasibətilə qələmə aldığı yazısındakı kimi səciyyələndirib: «Dayandurun poeziyasını ən qısa şəkildə belə səciyyələndirmək olar: Sadəlik, təbiilik, həyatilik, çoxəsrlik milli poeziya ənənələrinə bağlılıq, sevginin tərənnümü, gözəlliyin vəsfi, taleyin və cəmiyyətin şair qəbinə vurduğu zərbələrin ağrısından doğan dərd…» «Vektor» Nəşrlər Evində çap olunmuş kitabın redaktoru və önsözün müəllifi, alim, şair Elçin İsgəndərzadə çıxışında yubilyarla tanışlığından söhbət açıb: «20 il əvvəl Dayandurla ilk rastlaşıb görüşdüyümdə elə bildim ki, bir insanın yox, sadəliyin, zəhmətin, halallığın…əlini sıxıram. Mənə elə gəlir ki, Dayandur çağdaş cəmiyyətimizdə nadir insanlardan biridir ki, 55-in üzünə bir insan olaraq çox qürurla, alnıaçıq, üzüağ baxa bilir. Bu, insan ömrünün çox çətin və şərəfli bir məqamıdır. 20 ildir rəğbət bəslədiyim Dayandur Sevgin mənim müşahidə və düşüncəmə görə, insanlığımızın saflıq etalonlarından biridir. «Xoş gəldin 55 yaşım» kitabını oxuyanların buna bir daha şahid olacağına inanıram». Tədbirdə çıxış edənlər Dayandur Sevginin poeziyasının məziyyətlərindən, həm də şairin insani keyfiyyətlərindən danışıblar. Sonda çıxış edən yubilyar qonaqlara minnətdarlığını bildirib və oxucular üçün kitabını imzalayıb.
S.A