Moskva Millətlər evində şairə-publisist Rusiya və Avrasiya Yazarlar birliklərinin üzvü Afaq Şıxlının yaradıcılığına və yeni “Bədii tərcümələr” kitabının təqdimatına həsr olunmuş gecə keçirildi.

“Şəhriyar” Ədəbi-mədəni cəmiyyətinin təşkil etidyi gecə Afaq Şıxlının yaradıcılığından bəhs edən video süjetlə başladı.

“Şeirlər şairlərin övladları kimidir. Doğma övladlarına məhəbbət və qayğı payından kəsmək hesabına doğulur, o şeirlər. Bəlkə elə ona görədir ki, o övladlar şair ata-anaları üçün deyil, sadəcə ata-anaları üçün darıxır, onları istəyirlər”.

Gecədə Afaq Şıxlının qızı, ÜAK saytının baş redaktoru Nilufər A. Şıxlı anası haqqında nitqinə elə şairənin yuxarıda söylədiyi bu sözlərdən yola çıxaraq başladı.

 “Anaya məhəbbət - uşağın doğulduğu andan hiss etdiyi ilk məhəbbətdir. O insanın mayasındadır. Ona görə ananı ana kimi sevmək təbii ki, asandır. Amma ananı həm də şairə kimi sevmək – bax bu çox çətindir. Və mən bu illər ərzində onu təkcə anam kimi deyil, yüzlərlə oxucusunun urəyini fəth etmiş tanınmış şairə Afaq Şıxlı kimi sevməyi öyrəndim”.

 Nilufər A. Şıxlı anasının onlara-övladlarına ayıracağı vaxtdan kəsib şeirə verməsdindən kədərlənsə də, “hər bir şeir yazılıb yığılıb kitab halına düşdükdən sonra o kitabları vərəqləyib oxuduqca anlayırsan ki, bu belə də olmalıdır və ona qarşı çıxmaq günahdır”, - qənaətinə gəldiyini söylədi.

 O, davam edərək şairə Afaq Şıxlının qızı kimi bu gecəni açmaq ona həvalə olunduğu üçün qürur duyduğunu da gizlətmədi.

 “Şəhriyar” Ədəbi-mədəni cəmiyyətinin sədri Vasif Məmmədov şairə Afaq Şıxlının həyat və yaradıcılıq yoluna qısa nəzər salaraq onun Moskva ədəbi mühitinə gəlişindən və az bir zamanda bir neçə kitaba imza atmasından danışdı. Sonra şairəni səhnəyə dəvət etdi.

 Boynunda, Azərbaycan qadınının simvolu olan, ag kəlağayı ilə səhnəyə çıxan Afaq Şıxlı bu gecəni təşkil edənlərə minnətdarlıqla Azərbaycan poeziyası ətrafına toplaşanları salamlayaraq, təmsil olunduğu “Şəhriyar” ƏMC və öz adından hamıya xoş gəldin etdi.

“Qürbət biz qələm adamlarını bir az daha kövrək edir. Mənə elə gəlir ki, bu kövrəklik altında Vətənə ikiqat atrıq sevgi gizlənib. Biz oranın nisgilini qəlbimizdən süzülən poetik misralarla söndürürük”, - dedi.

Onu sözün yaxşı mənasında təsirləndirən bu gecədə “çatmayanlardan” danışdı.

“Bu gecə bu sevinci mənimlə birgə paylaşmaq istədiyim anam Mirvari çatmır. Yol uzaq, yaş da o yaş deyil deyə gələ bilməyib. Azərbaycanın baş geoloqu rəhmətlik atam Arif Şıxlınski çatmır. Məni tərbiyə edən və ədəbiyyatı mənə sevdirən, 40 illik pedaqoji təcrübəsi olan rəhmətlik bibim çatmır. Və bir də əmim - AYB-nin keçmiş sədri xalq yazıçısı İsmayıl Şıxlı çatmır”.

 Gecənin nüfuzlu qonağı - Türkiyədən şairənin yubileyinə gələn taninmiş şair Məmməd İsmayıl “Şeirə sevgi, sözə sevgi - Allaha sevgidir!” - dedi.

“Afaq xanımın seirlərini sevmək elə Allahı sevmək deməkdir. Sənətə gələn qadınlar öz ədəbi mühitlərini özləri yaradırlar və bunu dişi ilə, dirnağı ilə edirlər. Marina Svetayeva, Anna Axmatova kimi şairələr də bu yoldan keçiblər. Adlar da taleyimizdə böyük rol

oynayır. Anna Axmatova – A.A və Afaq Abdullayeva Şıxlı - yenə A.A. Mən Afaqı Azərbaycanın Anna Axmatovası adlandırardım. Bəlkə bunu söyləmək üçün hələ bir az tezdir, amma olsun, zaman bunu təsdiqləyəcək.

 Bir şerimdə dediyim kimi:

Bir nurlu sahil var hələ sabahda,

Qaranlıq sulara yol açar avar.

Bir adam yol gedər bizdən qabaqda,

Amma bir adam da bizdən sonra var.

 Bizdən sonra gələnlər - gənclər də var. İsmayıl Şıxlı nəslinin ən böyük uğuru Afaq Şıxlıdır. Mərhum dostumun, qardaşımın ruhu əlbəttə ki, bu gün bizimlədir!”

 Məmməd İsmayıl onu da əlavə etdi ki, əgər ədəbi mühitdə son iki ildə əldə edilən nailiyyətlər üzrə yarış keçirilsəydi, Afaq Şıxlı məshuldarlıq baxımından sözsüz ki, qalib gələrdi. “Mən ona həyatda və sənətdə uğur arzulayıram”, - sözlərilə fikrinə yekun vurdu.

 Yaradıcılıq gecəsində çıxış edən “Ocaq” ədəbi ictimai cəmiyyətinin sədri, AYB Moskva bölməsinin rəhbəri, türkoloq alim, professor Tofik Məlikli isə Afaq Şıxlı nəzmindən söz açaraq, “onun şeirlərini sevdirən - o şeirlərdə səmimiyyətin olmasıdır”, - söylədi.

“Afaq Şıxlı yazdığı şeirlərə ürəyini qoyur yazır. Ona görə o şeirlər belə axıcı və gözəl alınır. Onun şeirlərində diqqəti çəkən iki məqam var - sevgi və obrazlılıq. Onun şeirlərinin leytmotivi məhz bu iki hiss üzərində qurulub. Şeiri oxuduqca ondan aldığın duyğu obrazlı olaraq gözün onundə canlanır”.

 O şairəinin qızının çıxışından mütəəssir olduğunu da gizlətməyərək M. Qorkinin oğluna verdiyi kitabda avtoqraf kimi “ Ən gözəl əsərim olan oğluma” yazdığını xatırladaraq, “Afaq xanım, sizin ən böyük əsəriniz Nilufər Şıxlıdır!”- dedi.

 MDLU-nun Azərbaycan dili və mədəniyyəti mərkəzinin direktoru filologiya elmləri doktoru, professor Bella Musayeva Afaq Şıxlının bütün kitablarını, mətbuatda gedən çıxışlarını oxuduğunu qeyd etdi.

“Afaq xanım, müsahibələrinizin birində mən şairə yox, şairəm deyirsiniz. Mən bu fikirlə razılaşmıram. Sizin şeirlərinizdə zəriflik, incəlik, məlahət var. Və şairə sözü də, elə bununla asossiasiya olunur”.

 O Afaq xanımı Azərbaycan şairələri Məshəti Gəncəvi, Xurşudbanu Natavan, Nigar Rəfibəyli kimi şairələrimizə bənzətdiyini bildirdi.

 Rusiya Yazıçılar Birliyinin üzvləri: şair-tərcüməçi Mixail Sinelnikov, Sergey Karatov, şairlər: Sultan Mərzili, Nəsib Nəbioğlu, İlham Bədəlbəyli, Ümumrusiya Azərbaycanlıları Konqresinin nümayəndəsi Manaf Ağayev, müəllimələr: Xalidə Səmədova, Mehriban Abdullayeva və digər çıxış edənlər Afaq Şıxlının yaradıcılığına qiymət verərək onun şeirlərindəki poetik sözə vurğunluqdan, vətən, qürbət mövzusunun incə şair ruhu ilə qələmə alınmasından söz açdılar.

 Gecədə Azərbaycanın əməkdar artistin- tarzən Qorxmaz Axundovun rəhbərliyi ilə muğam üçlüyü şairənin qəzəllərini ifa etdilər.

 Abbas Alıyev, Orxan Türkoğlunun sazda səsləndirdiyi havalar yaradıcılıq gecəsinin xoş abu-havasına şirin ovqat qatdı.

 MDDU-nun rus tələbələrinin Afaq xanımın şeirlərini ana dilimizdə səsləndirmələri, 157 saylı Azərbaycan etno-təmayüllü məktəbin şagirdlərinin hazırladığı kompozisiya, Rusiya Gözəllik və İstedadlar müsabiqəsinin laureatı Higar Zakirovanın skripkada ifası alqışlarla qarşılandı.

 Saratovdan gələn qonaq, gənc naşir Ramilə Bəşirzadənin Afaq Şıxlının “Yeddidən biri. Bədii tərcümələr” kitabını cap edərək şairəyə hədiyyə etməsi və rəssam İlhamə Qurbanovanın bir dəstə çiçək yerinə, yağlı boya ilə kətan üzərinə işlədiyi “Qızılgül dəstəsi” rəsm əsərini ərməğan etməsi isə şairəyə gözlənilməz və xoş bir sürpriz oldu.

 Gecədə Azərbaycan mədəniyyətinin və ədəbiyyatının Rusiyada və Türkiyədə təbliğinə və inkişafına töhvə verənlər - 18 Mart Çanaqqala universitetinin professoru, şair Məmməd İsmayıl, şairə Afaq Şıxlı, alim, mühəndis, Saratov “Volqopromstroybezopastnosti” elmi-texniki təhqiqat mərkəzinin rəhbəri Rafail Qəribov və 157 saylı məktəbin metodisti Sevil İsmayılova “Şəhriyar” ƏMC-nin diplomu təqdim edildi.

 Yaradıcılıq gecəsində Azərbaycanın Rusiyadakı səfirliyinin, ÜAK-ın, “Ocaq” cəmiyyətinin, Azərbaycan Mədəniyyət və Həmrəylik mərkəzinin, Azərbaycan Mədəniyətinin İntibahı və İnkişafı fondunun nümayəndələri, Moskva Yazarlar birliyinin katibi A. Anançev, Yuri Kuznetsovu ana dilimizə tərcumə edən Xalid Xoca, şairlər Əşrəf Hüseynli, Yavər Həsən, Əliş Əvəz və başqaları iştirak edirdilər.