Bu günlərdə azərbaycanlı yazıçı və dramaturq Nüşabə Əsəd Məmmədlinin "Payız tanqosu" ("Autumn Tango", London, 2015) kitabı Böyük Britaniyada nəşr olunub.
Nəfis tərtibatla və yüksək poliqrafik keyfiyyətlə nəşr edilmiş kitabı ingilis dilinə Cavid Abbasov tərcümə edib. Kitabın redaktoru ingilis yazıçısı və publisisti Michael Brannockdur.

Kitaba müəllifin "Qürub" povesti, "Payız tanqosu", "Süleyman peyğəmbərin padşahlığı", "Həzrət Abbas ərizəsi" hekayələri daxil edilib. Təsvir olunan hadisə və əhvalatların özünəməxsus səpkidə canlandırıldığı bu əsərlərdə yazıçı müasirlərini düşündürən və narahat edən bir sıra mühüm sosial və mənəvi-əxlaqi problemlərə toxunub.

Kitabı www.lulu.com, www.amazon.com, www.books.google.com saytlarından sifariş yolu ilə əldə etmək olar.

Qeyd edək ki, bu, Nüşabə Əsəd Məmmədlinin ingilis oxucularına təqdim olunan ilk əsəri deyil. Belə ki, ötən il Amerikada nəşr olunan "Müasir Azərbaycan qadın nəsri" (Modern Azerbaijani Women's Prose, Trafford Publishing, Bloomington, 2014) antologiyasına yazıçının bir neçə hekayəsi daxil edilib.
AYB.az